प्रतिनिधी/ बेळगाव
बुलेट मोटारसायकली चोरणाऱ्या एका तरुणाला अटक करून त्याच्याजवळून सुमारे पाच लाख रुपये किमतीच्या तीन बुलेट जप्त करण्यात आल्या आहेत. अथणी पोलिसांनी शनिवारी ही कारवाई केली आहे.
जिल्हा पोलीसप्रमुख डॉ. संजीव पाटील यांनी शनिवारी सायंकाळी एका पत्रकाद्वारे ही माहिती दिली आहे. अथणीसह वेगवेगळ्या ठिकाणी चोरण्यात आलेल्या बुलेट मोटारसायकली जप्त करण्यात आल्या आहेत.
पोलीस उपअधीक्षक श्रीपाद जलदे, पोलीस निरीक्षक रविंद्र नायकोडी यांच्या मार्गदर्शनाखाली उपनिरीक्षक शिवशंकर मुक्री, चंद्रशेखर नांगनूर, एफ. एस. इंडीकर व त्यांच्या सहकाऱ्यांनी ही कारवाई केली आहे. अटक करण्यात आलेल्या तरुणाने आणखी कोठे चोरी केली आहे का, याचा तपास करण्यात येत आहे.
