निवडणूक निरीक्षक एस. मालारवी यांची सूचना
प्रतिनिधी/ बेळगाव
गोकाक आणि यमकनमर्डी विधानसभा मतदारसंघाचे निवडणूक निरीक्षक आणि आयएएस अधिकारी एस. माला रवी यांनी संपर्क आणि माहिती प्रसार खात्याच्या कार्यालयात असलेल्या मीडिया मॉनिटरींग युनिटला भेट दिली. यावेळी त्यांनी इलेक्ट्रॉनिक आणि प्रिंट मीडियामध्ये प्रसिद्ध होणाऱ्या बातम्यांवर लक्ष ठेवण्याचे आदेश दिले आहेत.
आचारसंहिता भंग होऊ नये, प्रत्येक मतदारसंघामध्ये आचारसंहिता अबाधित ठेवण्यासाठी नोडल अधिकारी व निवडणूक अधिकाऱ्यांच्या नजरेला बातम्यांबाबतची माहिती वेळेवर द्यावी, असे त्यांनी माहिती विभागाचे उपसंचालक गुरुनाथ कडबूर यांना सांगितले. जिल्ह्यातील माध्यम प्रतिनिधींवर नजर ठेवणे महत्त्वाचे आहे. त्यासाठी विभागातील नोडल अधिकाऱ्यांनी लक्ष ठेवावे, असेही स्पष्ट केले.
जिल्ह्यातील 18 मतदारसंघांतील उमेदवारांकडून देण्यात येणाऱ्या जाहिरातींची नोंद करणे महत्त्वाचे आहे. आचारसंहिता असलेल्या विभागावर अतिबारीक लक्ष ठेवून प्रत्येक अधिकाऱ्यांनी काम करावे, असे सांगितले. गोकाक मतदारसंघातील निवडणूक अधिकारी गीता कौलगी, यमकनमर्डी मतदारसंघाचे निवडणूक अधिकारी बलराम चव्हाण, मीडिया सर्व्हिलन्स युनिटच्या अधिकारी श्रीदेवी नागनूर, सुनील पाटील, होळेप्पा नायक, आर. एस. वालीशेट्टी, लक्ष्मण तळवार, अरुण नेसरगी यांच्यासह इतर अधिकारी उपस्थित होते.
