साहित्यिक डॉ. सिद्धलिंगय्या यांचे निधन

बेंगळूर : कन्नडमधील प्रसिद्ध साहित्यिक नाडोज डॉ. सिद्धलिंगय्या यांचे शुक्रवारी कोरोनामुळे निधन झाले. शनिवारी सकाळी त्यांच्यावर कोविड मार्गसूचीचे पालन करून शासकीय इतमामात कलाग्राम येथे अंत्यसंस्कार करण्यात येणार आहेत. कोरोनाचे निदान झाल्यानंतर डॉ. सिद्धलिंगय्या यांना बेंगळूरमधील मणिपाल इस्पितळात दाखल करण्यात आले होते. मात्र, उपचाराचा उपयोग न झाल्याने त्यांचे निधन झाले. डॉ. सिद्धलिंगय्या यांनी दलित आंदोलन आणि सामाजिक समानतेसाठी काव्यनिर्मिती केल्या. बेंगळूर ग्रामीण जिल्हय़ाच्या मागडी तालुक्यातील मंचिनबेले येथे 1954 मध्ये त्यांचा जन्म झाला. ते दोन वेळा विधानपरिषदेचे सदस्यही होते. डॉ. आंबेडकर, पेरियार, वसुदेवभुपाल, लोहियार यांच्या विचारांमुळे ते प्रभावित झाले होते. साहित्यनिर्मितीतील योगदानाबद्दल राज्य सरकारने त्यांना राज्योत्सव पुरस्काराने सन्मानित केले होते. शिवाय पंप यासारख्या अनेक पुरस्कारांचे ते मानकरी ठरले होते.