शिवसेनेचे कुपवाड शहरप्रमुख अमोल पाटील यांची मुख्यमंत्र्यांकडे मागणी
प्रतिनिधी / कुपवाड
राज्यातील सर्व स्थानिक स्वराज्य संस्थेमध्ये घनकचरा व्यवस्थापन अंतर्गत शासन निर्णयानुसार उपभोगकर्ता कर लावण्यात आला आहे. त्याची करप्रणाली जाचक आणि चुकीच्या पद्धतीने आहे, ती तातडीने रदद् करावी, अशी मागणी शिवसेनेचे कुपवाड शहरप्रमुख अमोल पाटील यांनी केली आहे. या संदर्भात राज्याचे मुख्यमंत्री उध्दव ठाकरे व पर्यावरण मंत्री आदित्य ठाकरे यांच्याकडे लेखी निवेदनाद्वारे तक्रार केली असल्याचे अमोल पाटील यांनी सांगितले.
एका झोपडपट्टीमध्ये राहणाऱ्या कुटुंबाला उपभोगकर्ता कर घरपट्टी ९६ रुपये तर उपयोगिता कर १०८० रुपये आहे. त्यामुळे सर्वसामान्य नागरिकांना कर भरणे मुश्किलीचे आहे. याशिवाय सांगली मिरज आणि कुपवाड महापालिकेमार्फत दि.अ. यो.राष्ट्रीय नागरी उपजिविका अभियान अंतर्गत फेरीवाला यांना परवाना आणि ओळखपत्र नोदणी करण्यासाठी उपयोगिता कर भरल्याशिवाय नोदनी परवाना दिला जात नाही, हा नियम जाचक आहे. त्यामुळे शासन स्तरावर एक समिती स्थापन करून सर्व घटकांचा विचार करून उपभोगकर्ता कर प्रणाली अमलात आणावी. सध्या लावण्यात आलेल्या उपभोगकर्ता कराला स्थगिती देण्यात यावी. तसेच राज्यातील सर्वसामान्य नागरिक, व्यापारी, व्यावसायिक, हात गाडीवाले, फेरीवाले, भाजी विक्रेते, हॉटेल चालक आदी घटकांची या जाचक करातून सोडवणुक करावी, अशी मागणी करण्यात आली आहे.
