प्रतिनिधी / कोल्हापूर
नॅनो बायो विषयावरील भारतातील दुसऱया आंतरराष्ट्रीय ट्विटर परिषदेचे आयोजन न्यू कॉलेज, दादा पाटील महाविद्यालय कर्जत आणि शिवाजी विद्यापीठ यांच्या संयुक्त विद्यमाने करण्यात आले आहे. 13 ते 15 एप्रिल या दरम्यान ही परिषद होणार आहे. शिवाजी विद्यापीठाचे कुलगुरू मा. देवानंद शिंदे यांच्या हस्ते ऑनलाईन पध्दतीने होणार आहे.
करोना विषाणूच्या पार्श्वभूमीवर विद्यापीठ अनुदान आयोग, नवी दिल्ली तसेच महाराष्ट्र शासनाच्या वर्क फ्रॉम होम आवाहनाला प्रतिसाद म्हणून सदर परिषदेचे आयोजन करण्यात आले आहे. या परिषदेमध्ये नॅनो तंत्रज्ञान, जैव तंत्रज्ञान आणि करोना विषाणूला नियंत्रित करण्याच्या विषयावर पोस्टरच्या माध्यमातून सादरीकरण होणार आहे. ही परिषद ऑनलाईन असल्याने प्रत्यक्ष भेटी गाठी ऐवजी घरात बसून सहभागी होता येणार आहे. 21 दिवसाच्या लॉकडाऊनच्या काळातील भारतातील ही एकमेव परिषद आहे. या परिषदेमध्ये आत्तापर्यंत जगभरातून 175 च्या वर संशोधकांनी सहभाग नोंदवला आहे. या ट्विटर परिषदेमध्ये जास्तीत जास्त संशोधकांनी सहभागी व्हावे, असे आवाहन परिषदेचे समन्वयक डॉ. मानसिंगराज निंबाळकर यांनी केले आहे.
