विकी कतरिनाचा हानिमून नाही

बालिवूडमधील सध्याची चर्चेत असलेली जोडी म्हणजे विकी कौशल आणि कतरिना कैफ. गेली तीन वर्षे डेट केल्यानंतर डिसेंबरच्या गुलाबी थ्डींत दोघांचे डेस्टीनेशन वेडिंग राजस्थानमध्ये होणार आहे. खरंतर अनेकदा सेलिब्रिटींच्या विवाहाविषयी अफवा पसरत असतात. पण विकी आणि कतरिना एकमेकांच्या गळय़ात खरोखरच हार घालणार आहेत आणि काही दिवसांपूर्वी त्यांचे यावर शिक्कामोर्तबही झालं आहे. राजस्थानमधील सवाई माधोपूरमधील बारवाडा किल्ल्यात हा शाही विवाह होणार आहे. आता विवाहाची चर्चा सुरू आहे तोपर्यंतच कतरिना आणि विकीच्या चाहत्यांमध्ये कुजबूज सुरू होती ती हे जोडपं हनिमूनला कुठे जाणार याची. कारण विकी आणि कतरिना या जोडीचे ग्लॅमर पाहता हनिमूनसाठी ते कोणतं डेस्टिनेशन निवडणार, तिथे एकमेकांसोबत किती दिवस घालवणार आणि त्याचे फोटो कधी शेअर करणार या चर्चेलाही उधाण आलं होत. पण कतरिना आणि विकी हनिमून ब्रेकच घेणार नाहीत असं त्यांनी सांगितलं आणि त्यांच्या चाहत्यांमध्ये सुरू असलेल्या चर्चेचा फुगा फुटला. ही जोडी हनिमूनला सध्या तरी जाणार नाही कारण दोघांच्याही हातात काही सिनेमे आहेत. त्यामुळे डिसेंबरच्या मध्यानंतर विकी त्याच्या कामात व्यस्त होईल तर कतरिना तिच्या शूटिंगसाठी पोहोचेल. मुळातच कोरोनामुळे दीडवर्षे शूटिंग नव्हतं. इंडस्ट्री ठप्प होती. आता सगळं मार्गावर येतंय तर हातात असलेले प्रोजेक्ट आपल्यामुळे लांबू नयेत असं या दोघांनाही वाटतय. आधी हनिमून हातातल्या सिनेमांचा आणि मग आमचा असं म्हणत कॅट आणि विकी यांनी हा निर्णय घेतला आहे.   दरम्यान, 7 डिसेंबरपासून राजस्थानमध्ये कॅट आणि विकीच्या विवाहाची धूम सुरू होत आहे. पाहुण्यांच्या प्रवासासाठी सगळय़ा रेंटल कार बुक करण्यात आल्या आहेत. त्यामुळे बहुतांशी पर्यटकांना या काळात रेंटच्या कार मिळण्याची शक्यता कमी आहे. दोघांची वेडिंग प्लॅनर टीम जोरदार काम करत आहे..