ओटवणे / प्रतिनिधी:
राष्ट्रीय कुडो बिग मिक्स मार्शल आर्ट स्पर्धेत सिंधुदुर्गचा सुपुत्र तेजस भालचंद्र सुर्वे याने रौप्य पदक पटकावले. भारत सरकारच्या क्रीडा मंत्रालयाच्या मान्यतेने हिमाचल प्रदेशमधील सलोन येथे ही स्पर्धा घेण्यात आली. या स्पर्धेत भारतातील २५ राज्यांमधील १५०० खेळाडूंनी सहभाग घेतला. ही स्पर्धा २ ते ७ सप्टेंबर अशी पाच दिवस चालली. या स्पर्धेत २१ वर्षांवरील पुरुष गटात कुडो फायटर्स म्हणून तेजस सुर्वे याने महाराष्ट्राचे प्रतिनिधीत्व केले. तेजस सुर्वे यापूर्वी आंतरराष्ट्रीय निप्पोन कुडो सोगो स्पर्धेत ब्लॅक बेल्टचा मानकरी ठरला होता. तसेच पुणे येथील जिल्हास्तरीय आणि राज्यस्तरीय कुडो स्पर्धेमध्ये त्याने गोल्ड मेडल पटकाविले होते.
तेजस सुर्वे सध्या पुणे दळवीनगर येथील गोल्डन ड्रॅगन मार्शल आर्ट या संस्थेत आहे. या स्पर्धेसाठी तेजस सुर्वे याला पुणे जिल्हा कुडो संघटनेचे अध्यक्ष अरविंद मोरे, सचिव राहुल पवार, सिंधुदुर्ग जिल्हा जुडो कराटे आकिदो असोसिएशनचे मुख्य प्रशिक्षक वसंत जाधव (सावंतवाडी) यांचे मार्गदर्शन लाभले. तेजस सुर्वे वैभववाडी तालुक्यातील नेर्ले गावचा सुपुत्र असुन माजगाव येथील बंड्या चौगुले यांचा भाचा आहे.
