प्रतिनिधी / खेड
लॉकडाऊनच्या काळात विद्यार्थ्यांना घरबसल्या ग्रंथालयाची माहिती, पुस्तकांची माहिती मिळावी, याकरिता सहजीवन शिक्षण संस्था संचलित आय.सी.एस. महाविद्यालयातील ग्रंथपाल डॉ. राजेश राजम यांनी निर्मिती केलेले ग्रंथालयाचे स्मार्टपेज सातासमुद्रापार पोहचले असून स्मार्टपेजला परदेशातूनही मागणी वाढली आहे. दक्षिण आफ्रिकेतील एस.आय.एम.टी. अँक्रा, घाणा या संस्थेने स्मार्टपेजची कल्पना संस्थेत वापरण्याची परवानगी सहजीवन शिक्षण संस्थेकडे मागितली आहे. यामुळे आय.सी.एस.चे नाव पुन्हा एकदा जगाच्या कानाकोपऱ्यात पोहचले आहे.
स्मार्टपेजमध्ये ग्रंथालयाची वेबसाईट, वेबपेज, न्यूज रिपॉझिटरी, फोटो गॅलरी, नोटीस, युट्यूब चॅनेल, मोबाईल अँप, लायब्ररीयन ब्लॉग आदी बाबी एकाच पेजवर उपलब्ध करून देण्यात आल्या असून ग्रंथालयाबाबतची सर्व माहिती येथे उपलब्ध आहे. वाचकांसाठी ऑनलाईन पब्लिक अँक्सेस कॅटलॉगही देण्यात आले आहे. विद्यार्थ्यांना मोबाईलवर सहज वापरण्या येण्याजोगे कल्पकतेने हे स्मार्टपेज डॉ. राजम यांनी बनवले आहे.
दक्षिण आफ्रिकेतील एस.आय.एम.टी. ॲक्रा, घाना या संस्थेचे रजिस्टार जोसेफ डंकी यांनी परवानगीचे पत्र पाठवत मागणीपत्रात स्मार्टपेज बनवणाऱ्या ग्रंथपाल डॉ. राजम यांचेही अभिनंदन केले आहे. सहजीवन शिक्षण संस्थेकडून अशाप्रकारचे स्मार्ट पेज वापरण्यासाठी परवानगी देणारे पत्र एस.एस.एम.टी. घाना या संस्थेस दिले जाणार आहे. ग्रंथपालांकडून त्यांना तांत्रिक सहाय्यही पुरवले जाणार आहे. एवढेच नव्हे तर मागणी आल्यास ज्या महाविद्यालयांना अशाप्रकारच्या स्मार्टपेजची निर्मिती करायची असल्यास त्यांनाही सहाय्य केले जाणार असल्याचे संस्थेकडून सांगण्यात आले.
आपल्या संस्थेच्या महाविद्यालयात अशाप्रकारचे स्मार्टपेज बनवले जाणे आणि त्याला परदेशातूनही मागणी येणे ही भूषणावह बाब असल्याचे संस्थेचे सेक्रेटरी मंगेश बुटाला यांनी सांगितले. स्मार्टपेजच्या निमित्ताने संस्था व महाविद्यालयाची ओळख परदेशापर्यंत झाली, हे अभिमानास्पद असल्याचे गौरवोद्गार महाविद्यालयाच्या गव्हर्निंग कौन्सिलचे चेअरमन अँड. आनंद भोसले यांनी सांगितले. विद्यार्थ्यांनी या स्मार्टपजचा जास्तीत जास्त उपयोग करून घ्यावा, असे आवाहनही संस्थेने केले आहे.
