प्रतिनिधी /म्हापसा
कचरा व्यवस्थापन क्षेत्रातील गोव्यातील पहिले स्टार्ट-अप यिंबी (इनोव्हेटिव वेस्ट ऍण्ड मेनेजमेंट) ची वाटचाल मुख्यमंत्र्यांच्या ‘स्वयंपूर्ण गोवा’च्या व्हिजनच्या मार्गावर सुरू आहे. या स्टार्ट-अपची स्थापना कोरोना महामारीच्या प्रारंभी झाली असूनही त्यांनी नफा कमावला आहे आणि एचएनआय तसेच कॉर्पोरेट फर्मकडून गुंतवणूक आकर्षित केली आहे. गोव्यातील या स्टार्ट-अपने कचरा व्यवस्थापनाच्या क्षेत्रात इतर गोमंतकीयांसाठी रोजगाराच्या संधी निर्माण केल्या आहेत.
उद्घाटन समारंभाला पर्यटन, आयटी, मुद्रण आणि स्टेशनरी मंत्री तथा पर्वरीचे आमदार रोहन खंवटे, म्हापशाचे आमदार तसेच जीएसआयडीसीचे उपाध्यक्ष जोशुआ डिसोझा, म्हापसा नगरपरिषदेच्या सभापती शुभांगी वायंगणकर आदी उपस्थित होते. यावेळी दिवंगत ऍड. फ्रान्सिस डिसोझा यांच्या स्मरणार्थ ‘शहरी आणि ग्रामीण हवामान बदल आणि शाश्वतता शिखर परिषद’ सुरू करण्याची घोषणा केली. ही घोषणा रिस्पॉन्सिबल अर्थ फाऊंडेशन ही स्वयंसेवी संस्था आणि यिंबीच्या संयुक्त विद्यमाने करण्यात आली. कार्यक्रमामध्ये नवीन लोगो आणि ई-फॉर्म्स वेबसाईटचे अनावरणही करण्यात आले. यामध्ये इकोफ्रेंडली उत्पादनांची विस्तृत श्रेणी असून यामधील नफा फाऊंडेशनसाठी दान करण्यात येणार आहे, अशी माहिती यावेळी देण्यात आली.
रोहन खंवटे यांनी याबाबत समाधन व्यक्त केले. स्टार्ट-अपचा योग्य उपक्रम बनून त्यांचा व्यवसाय वाढवायचा होता म्हणून यिंबीचा हा पुढे जाण्याचा मार्ग मोकळा झाला. गौरव पोकळे यांनी कचरा गोळा करण्यापासून ते वीज निर्मितीपर्यंत आणि बरेच काही पर्याय आणि उपाय शोधून काढले आहेत. एक उद्योजक म्हणून ते आपला जीव ओतून उत्कटतेने जो उपक्रम घेतात तो पूर्ण करतात, असेही ते म्हणाले. आमदार जोशुआ डिसोझा यांनी, कचऱयातून संपत्ती निर्माण करण्याच्या या उत्कृष्ट उपक्रमाचे कौतुक करन गौरव पोकळे यांचे अभिनंदन केले.
व्यवस्थापकीय संचालक आणि सीईओ गौरव पोकळे म्हणाले, कचरा व्यवस्थापन क्षेत्रातील व्यवस्थापनावर वन स्टॉप सोल्युशन देणारी यिंबी ही देशातील एकमेव कंपनी असल्याचे सांगितले. सध्या आम्ही गोव्यात संपूर्णपणे कार्यरत असून लवकरच देशभरात शाखा सुरू करण्याबाबत आशावादी आहोत. राज्यातील शाश्वत विकासाच्या दिशेने हे एक पाऊल पुढे असल्याचे गौरव पोकळे म्हणाले.
