कोल्हापूरच्या डॉ. शैलेंद्र जाधव यांच्याकडे जबाबदारी
प्रतिनिधी/ रत्नागिरी
रत्नागिरी येथे शासकीय वैद्यकीय महाविद्यालय सुरु करण्यासंदर्भात आता वेगाने कार्यवाही होण्यास हिरवा कंदील मिळाला आहे. त्यासाठी राज्याचे वैद्यकीय शिक्षणमंत्री अमित देशमुख यांनी शासकीय वैद्यकीय महाविद्यालय निर्मितीसाठी प्रभारी अधिष्ठाता डॉ. शैलेंद्र जाधव यांची नियुक्ती केली आहे.
या संदर्भात वैद्यकीय शिक्षणमंत्री अमित देशमुख यांनी आढावा बैठक आयोजित केली होती. बैठकीस उच्च व तंत्र शिक्षण मंत्री उदय सामंत, व्हिडिओ कॉन्फरन्सिंगव्दारे रत्नागिरी-सिंधुदुर्ग जिल्हय़ाचे खासदार विनायक राऊत व रत्नागिरी, सिंधुदुर्ग जिल्हाधिकारी उपस्थित होते. या महाविद्यालयासाठी आवश्यक जागा निश्चित केली जावी. भारतीय आयुर्विज्ञान परिषद / राष्ट्रीय वैद्यक परिषद यांच्या मानकानुसार शासकीय वैद्यकीय महाविद्यालय व रुग्णालय निर्माण करण्याच्या दृष्टीने शासनाकडे पाठपुरावा करुन जागा हस्तांतरण करणे, आरोग्यसेवेबरोबर आवश्यक असलेले सामंजस्य करार करणे आदी कामे शीघ्र गतीने होण्यासाठी प्रभारी अधिष्ठाता नियुक्ती करण्याचा निर्णय घेण्यात आला आहे. यासाठी शरीररचनाशास्त्र, शासकीय वैद्यकीय महाविद्यालय, कोल्हापूर येथील विभागप्रमुख प्राध्यापक डॉ. शैलेंद्र जाधव यांची नियुक्ती करण्यात आली आहे. जिल्हा सामान्य रुग्णालय, रत्नागिरी येथे प्रस्तावित शासकीय वैद्यकीय महाविद्यालयासाठी निर्माण केलेल्या कार्यालयात उपस्थित राहण्यासाठी 23 ऑक्टोबरपासून प्रभारी अधिष्ठाता म्हणून त्यांची नियुक्त करण्यात आल्याचे पत्रही तातडीने जारी करण्यात आल्याचे खासदार विनायक राऊत यांनी आपल्या प्रसिद्धी पत्रकात म्हटले आह़े
