पंतप्रधान मोदींकडून देशवासीयांना शुभेच्छा
वृत्तसंस्था / नवी दिल्ली
भारतासह जगभरातील अनेक शहरांमध्ये धुलिवंदनाचा सण मंगळवारी साजरा करण्यात आला आहे. रंगोत्सवानिमित्त पंतप्रधान नरेंद्र मोदी यांनी देशवासीयांना शुभेच्छा दिल्या आहेत. “रंग, उत्साह आणि आनंदाचा सण असलेल्या होळीच्या सर्वांना शुभेच्छा. सर्व देशवासीयांच्या जीवनात या उत्सवाने आनंद यावा’’ अशा शब्दांत मोदींनी शुभेच्छा दिल्या आहेत. राष्ट्रपती रामनाथ कोविंद आणि केंद्रीय गृहमंत्री अमित शाह यांनीही धुलिवंदनानिमित्त देशवासीयांना शुभेच्छा दिल्या आहेत.
कोरोना विषाणूच्या प्रादुर्भावाच्या भीतीच्या पार्श्वभूमीवरही देशभरातील रंगोत्सवाच्या उत्साहात घट झालेली नाही. केवळ लोकांनी धुलिवंदन साजरा करताना आवश्यक खबरदारी घेतल्याचे दिसून आले आहे.
कोरोना विषाणू संकटाच्या पार्श्वभूमीवर आरोग्यविषयक सुरक्षा लक्षात घेऊन पुष्करमध्ये पर्यटकांनी मास्क परिधान करून रंगांचा आनंद लुटला आहे. लोकांच्या चेहऱयावर रंगांसह मास्कही दिसून आले आहेत. भारतापासून हजारो किलोमीटर अंतरावरही रंगांची उधळण झाली आहे. शेजारी देश असलेल्या पाकिस्तानातील हिंदू समुदायानेही धुलिवंदनाचा सण साजरा केला आहे. अमेरिका, ऑस्ट्रेलिया, दक्षिण आफ्रिकेतील भारतीय समुदायाने मोठय़ा उत्साहात रंगोत्सव साजरा केली आहे.
