ऑनलाईन टीम / नवी दिल्ली :
भारतात कोरोनाबाधितांच्या संख्येने तीन लाखांचा टप्पा ओलांडला असून, जगातील सर्वाधिक कोरोना रुग्णसंख्या असलेल्या देशांच्या यादीत भारत आता चौथ्या स्थानावर पोहचला आहे. मागील आठवड्यात सहाव्या स्थानावर असलेला भारत स्पेनसह इंग्लंडला मागे टाकत चौथ्या क्रमांकावर पोहचला आहे.
भारतात मागील 24 तासात सर्वाधिक कोरोना रुग्ण आढळून आले आहेत. शुक्रवारी 11 हजार 458 जणांना कोरोनाची बाधा झाली आहे. तर 386 रुग्णांचा मृत्यू झाला. देशातील एकूण कोरोनाग्रस्तांची संख्या आता 3 लाख 08 हजार 993 वर पोहचली असून, मृतांची संख्या 8884 एवढी आहे.
सध्या देशात 1 लाख 45 हजार 779 ॲक्टिव्ह कोरोना रुग्ण असून, त्यांच्यावर रुग्णालयात उपचार सुरू आहेत. आतापर्यंत 1 लाख 54 हजार 330 रुग्ण या आजारातून पूर्णपणे बरे झाले असून, त्यांना डिस्चार्ज देण्यात आला आहे.
देशातील कोरोना रुग्णांचे प्रमाण महाराष्ट्रात सर्वाधिक आहे. महाराष्ट्रात आतापर्यंत कोरोना रुग्णांच्या संख्येने एक लाखाचा टप्पा ओलांडला आहे. महाराष्ट्रात 1 लाख 01 हजार 141 रुग्ण आढळले आहेत. दिल्ली 36 हजार 824, तामिळनाडूत 40 हजार 698, गुजरातमध्ये 22 हजार 527, मध्यप्रदेश 10 हजार 443, आंध्र प्रदेश 5680, बिहार 6103, राजस्थान 12 हजार 068, उत्तरप्रदेश 12 हजार 616 तर पश्चिम बंगालमध्ये 10 हजार 244 कोरोना रुग्ण आढळून आले आहेत.
