सलग सातव्या दिवशी 3 लाखाहून कमी बाधित- 3.55 लाख रुग्ण कोरोनामुक्त
नवी दिल्ली / वृत्तसंस्था
देशात कोरोनाच्या दुसऱया लाटेत मोठय़ा प्रमाणात रुग्ण आढळून आले आहेत. मात्र, आता कोरोनाची दुसरी लाट ओसरताना दिसत आहे. मागील काही दिवसांपासून देशातील नवीन रुग्णांची संख्या तीन लाखाच्या खाली आली आहे. केंद्रीय आरोग्य मंत्रालयाने रविवारी सकाळी दिलेल्या आकडेवारीनुसार, देशात गेल्या 24 तासात 2 लाख 40 हजार 842 नवीन रुग्ण आढळून आले आहेत.
देशात गेल्या 24 तासात 3 लाख 55 हजार 102 रुग्णांनी कोरोनावर मात केली आहे. आतापर्यंत 2 कोटी 34 लाख 25 हजार 476 रुग्ण कोरोनामुक्त झाले आहे. नवीन रुग्णांच्या तुलनेत कोरोनामुक्त होणाऱयांची संख्या ही अधिक असल्याने सक्रिय रुग्णांची संख्या देखील कमी झाली आहे. सध्या देशामध्ये 28 लाख 5 हजार 399 सक्रिय रुग्ण असून त्यांच्यावर उपचार सुरु आहेत. देशात सर्वाधिक सक्रिय रुग्ण महाराष्ट्रात आहेत. महाराष्ट्रात सध्या 3 लाख 52 हजार 247 रुग्ण उपचार घेत आहेत.
मृतांच्या संख्येतही घट
देशात शनिवारी दिवसभरात 3 हजार 741 रुग्णांचा उपचारादरम्यान मृत्यू झाला आहे. यामुळे देशात कोरोनामुळे मृत्यूची संख्या 3 लाखांजवळ पोहोचली आहे. देशात आतापर्यंत 2 लाख 99 हजार 266 नागरिकांचा कोरोनामुळे मृत्यू झाला आहे. गेल्या काही दिवसात मृत्यूचा आकडा वाढत असल्याने चिंता कायम असतानाच रविवारी बळींची संख्या कमी झाल्याने दिलासा मिळाला आहे.
चाचण्यांची विक्रमी झेप कायम
मागील काही दिवसांमध्ये देशात विक्रमी कोरोना चाचण्या होत आहेत. गेल्या 24 तासांत 21 लाख 23 हजार 782 जणांची कोरोना चाचणी झाली आहे. हा आतापर्यंतचा सर्वात मोठा आकडा आहे. देशाचा पॉझिटिव्हिटी दर घसरून तो 11.34 टक्के झाला आहे. गेल्या 24 तासांत 16 लाख 4 हजार 542 जणांना लसीचा डोस देण्यात आला. आतापर्यंत देशात एकूण 19 कोटी 50 लाख 4 हजार 184 डोस दिले गेले आहेत.
