वृत्तसंस्था/ कोविलपट्टी (तामिळनाडू)
हॉकी इंडियाच्या येथे सुरू असलेल्या 12 व्या कनिष्ठ पुरुषांच्या राष्ट्रीय हॉकी स्पर्धेत सोमवारी सातव्या दिवशी तामिळनाडू, झारखंड आणि दिल्ली या संघाने आपल्या प्रतिस्पर्ध्यावर विजय मिळविले.
ग गटातील झालेल्या पहिल्या सामन्यात तामिळनाडूने गोवा संघाचा 11-0 अशा गोलफरकाने दणदणीत पराभव केला. या लढतीत तामिळनाडूचा कर्णधार बी. सतीशने 4 गोल नोंदविले. गोवा संघाला शेवटपर्यंत आपले खाते उघडता आले नाही. ग गटातील अन्य एका सामन्यात झारखंडने छत्तीसगडवर 6-2 अशा गोलफरकाने मात करत पूर्ण गुण वसुल केले. च गटातील सामन्यात दिल्लीने गुजरातचा 13-1 असा दणदणीत पराभव केला. गुजरात संघातील नंदकिशोरने 4 गोल तर कर्णधार नितीनने 4 गोल नोंदविले. क गटातील दुसऱया सामन्यात ओदिशाने पुडुच्चेरीचा 9-0 असा एकतर्फी पराभव केला. क गटातील अन्य एका सामनयात दमण-दीव संघाने राजस्थानवर 4-0 अशी मात केली.
