प्रतिनिधी /म्हापसा
रविवारी मध्यरात्री कळंगुट पोलिस पथकाकडून ओर्डा-कांदोळी येथील एका विदेशी महिलेच्या राहात्या घरावर सापळा रचून घातलेल्या धाडीत 12 लाख 12 हजार 800 रुपयांचा विविध प्रकारचा मादक पदार्थ जप्त करण्यात आला. यासंदर्भात संशयित प्रिसीला अड्जेते (37) या घाना देशाच्या नागरिक असलेल्या महिलेस पोलिसांनी ताब्यात घेतले असून तिची रवानगी स्थानिक पोलिस कोठडीत करण्यात आल्याची माहिती पोलिस निरीक्षक लक्षी आमोणकर यांनी दिली.
ओर्डा-कांदोळी येथील भाडय़ाच्या घरात भाडोत्री म्हणून राहाणाऱया या विदेशी महिलेचा अमलीपदार्थ प्रकरणात सहभाग असल्याची माहिती गुप्त सुत्रांकडून पोलिसांना मिळाली होती, त्यानुसार कळंगुट पोलिस स्थानकाचे निरीक्षक लक्षी आमोणकर तसेच त्यांच्या सहकारी पथकाने सापळा रचून घरावर धाड घातली असता हेरॉईन 33 ग्राम, कोकेन 35 ग्राम, चरस 35 ग्राम तसेच एक्टासी 8 ग्राम याप्रमाणे विविध प्रकारचे मादक पदार्थ मिळून अंदाजे 12 लाख 12 हजार 800 रुपयांचा (आंतरराष्ट्रीय बाजार किंमत) अमलीपदार्थ जप्त करण्यात आला आहे.
कळंगुट पोलिस स्थानकाचे निरीक्षक लक्षी आमोणकर यांच्या सोबतीने उप-निरीक्षक राजाराम बागकर, हेड-कॉन्स्टेबल विद्या आमोणकर, कॉ. भगवान पालयेंकर, गणपत तिळोजी, फ्रान्सिस फर्नाडीस, आमीर गरड, आकाश नाईक, महेंद्र च्यारी तसेच चालक सुनील म्हाळशेंकर यांनी या कारवाईत भाग घेतला.
संशयित महिला प्रिसीला यांच्या विरोधात कळंगुट पोलिसांकडून अमलीपदार्थ विरोधी कायद्यानुसार रितसर गुन्हा दाखल करण्यात आला असून उप-अधिक्षक विश्वेष कर्पे तसेच उत्तर गोवा पोलिस अधिक्षक शोबीत सक्सेना यांच्या मार्गदर्शनाखाली पुढील तपास जारी आहे.
