कपिल ते कपिल शर्मा

कपिल शर्मा देशातला सर्वाधिक लोकप्रिय कॉमेडियनपैकी एक मानला जातो. प्रचंड मेहनतीच्या जोरावर त्याने स्वतःची वेगळी ओळख निर्माण केली आहे. आज कपिलला त्याच्या कामामुळे ओळखले जाते. मनोरंजन क्षेत्रात कोणीही गॉडफादर नसताना कपिलने आतापर्यंतचे यश मिळविले आहे. त्याचा हा प्रवास नक्कीच प्रेरणादायी आहे. कपिल शर्माने आयुष्यात अनेक चढ-उतार पाहिले आहेत. आता त्यांची ही स्ट्रगल स्टोरी मोठय़ा पडद्यावर दाखवली जाणार आहे. कपिल शर्माचा बायोपिक लवकरच प्रेक्षकांच्या भेटीला येणार आहे. कपिल शर्माच्या जीवनावर चित्रपटाची निर्मिती केली जाणार असून याची घोषणा निर्माता महावीर जैन यांनी नुकतीच केली आहे. कपिल शर्माच्या चाहत्यांसाठी त्याच्या बायोपिकची घोषणा ही अत्यंत आनंदाची बातमी आहे. सध्या सोशल मीडियावर याची जोरदार चर्चा सुरू आहे आणि कपिलवर कौतुकाचा वर्षाव सुरू आहे. कपिल शर्माच्या जीवनावर तयार होत असलेल्या या चित्रपटाचं नाव ‘फनकार’ असे आहे. या बायोपिकचे दिग्दर्शन मृगदीप सिंह लांबा करणार आहे. त्यांनी याआधी ‘फुकरे’ चित्रपटाचे दिग्दर्शन केले आहे. हा चित्रपट बॉक्स ऑफिसवर तुफान चालला होता. याच चित्रपटातून मृगदीप सिंह लांबा यांना दिग्दर्शक म्हणून स्वतःची ओळख मिळाली होती. आता बायोपिकमध्ये कपिलची भूमिका कोण साकारणार याचा खुलासा झालेला नाही. कदाचित कपिल शर्मा स्वतःच काम करण्याची शक्यताही आहे. त्याने आयुष्यात बरेच चढ-उतार पाहिले आहेत. यशस्वी करिअरनंतर डिप्रेशन, सुनील ग्रोव्हरशी भांडण, शो बंद होणे अशा अनेक समस्यांचा सामना केल्यानंतर कपिलने पुन्हा एकदा छोटय़ा पडद्यावर कमबॅक केले. अनेक वादग्रस्त कारणांमुळे तो चर्चेतही राहिला होता.