प्रतिनिधी / उंब्रज :
आशियाई महामार्गावर शिवडे (ता.कराड) येथे भरधाव वेगाने जाणाऱया एसटी बसला अज्ञात ट्रकने हुलकावणी दिल्याने भीषण अपघात झाला. शिवडेच्या उत्तरमांड नदीच्या पुलावरील कठडय़ाला धडकून बस पलटी झाली. या अपघातात महाविद्यालयीन विद्यार्थ्यांसह सुमारे 25 हून अधिक प्रवाशी जखमी झाले आहेत. एसटीतून 62 च्या वर प्रवाशी प्रवास करत होते. जखमींवर उंब्रज येथील खासगी रुग्णालय व आरोग्य केंद्रात उपचार सुरू आहेत. पुलावरील धोकादायक वळणावर हा अपघात झाल्याने भीतीचे वातावरण निर्माण झाले होते. अपघातानंतर अनेक विद्यार्थिनींना रडू कोसळले. तसेच वाहतूक कोंडी निर्माण झाली होती. अपघातानंतर जखमींच्या नातेवाईकांनी रुग्णालयाबाहेर गर्दी केली होती.
अपघातात धनश्री संदीप जगताप (रा. उंब्रज), आकांक्षा दादासाहेब पाटील (रा. नाणेगाव बुद्रुक), स्वाती अरविंद गायकवाड (रा.सातारा), बबन भगवान पाटील (रा.सातारा), हणमंत रामचंद्र गोरे (रा.चोरे), लता कृष्णराव लोखंडे (रा.कोल्हापूर), आरती रामचंद्र पाटील (रा.नाणेगाव बुद्रुक), धनश्री संजय काटे (रा.उंब्रज), जगन्नाथ विष्णू जांभळे (रा.शिवडे) यांसह अन्य प्रवाशी जखमी झाले आहेत. जखमीपैकी काहीजण गंभीर असून उर्वरित प्रवाशी किरकोळ जखमी आहेत. अन्य जखमींची नावे समजू शकली नाहीत.
याबाबत अधिक माहिती अशी, शनिवार 11 रोजी सांगली ते महाबळेश्वर बस ही कराड येथून सुटल्यानंतर सायंकाळी 5.30 च्या सुमारास शिवडे गावच्या हद्दीत पोहोचली. एसटी भरधाव वेगाने जात असताना शिवडे येथील उत्तरमांड नदीच्या पुलावर असणाऱया दुभाजकाला जोरात धडकली ही धडक भीषण असल्याने दुभाजक फुटला असून एसटीची पुढील दोन चाके तुटून पडली आहेत. अपघातानंतर बस दुभाजकाला धडकल्याने महामार्गावर पलटी झाली. या अपघातात एसटीमधील पंचवीस हून अधिक प्रवाशी जखमी झाले आहेत. जखमींमध्ये महाविद्यालयीन विद्यार्थी, विद्यार्थिनी, महिला, पुरुषांचा समावेश आहे. तसेच काही
प्रवासी गंभीर जखमी झाले आहेत. अपघातानंतर मोठा आवाज झाल्याने शिवडे व उंब्रज येथील नागरिकांनी घटनास्थळी धाव घेवून एसटीतील जखमींना तातडीने बाहेर काढून नजीकच्या शारदा क्लिनिकमध्ये तसेच इतर खासगी दवाखान्यात उपचारासाठी दाखल केले आहे. तसेच उंब्रज प्राथमिक आरोग्य केंद्रात किरकोळ जखमींवर उपचार करण्यात आले. अपघातग्रस्त एसटीतून सुमारे 62 च्यावर प्रवाशी प्रवास करीत होते. पैकी 13 प्रवाशी महाबळेश्वरला निघाले होते. तसेच उंब्रज येथील विद्यार्थी या एसटीतून प्रवास करीत होते.
अपघातस्थळी उंब्रज पोलीस, महामार्ग पोलीस यांनी मदतकार्य करुन वाहतूक सुरळीत केली. रात्री उशीरापर्यंत उंब्रज पोलिसांकडून अपघाताचा पंचनामा करण्याचे काम सुरू होते.
